اليوم السبت الموافق 2011/12/31 الساعة (وقت بداية التدوين) 03:45 صباحا عارفين كل سنة فى الوقت دة بقول إية ؟ ..... ياااااااااااااااة ... يااااااااة على الحياة ! .. و أستغرب و أتعجب و مع كل سنة يزيد التعجب ! فى ليلة رأس سنة 2010 أفتكر لما كنت راجع من الشغل بدرى عن العادى من (سموحة - الأسكندرية) و أنا بدعى إنى أستقبل السنة الجديدة على الشاطئ زى عادتى كل سنة ... و كنت واقف فى شارع أبو قير مستنى أى عربية و الدنيا زحمة و فاضل على السنة الجديدة نص ساعة .. يومها أتعرفت على واحد من ضمن الزحمة أسمة (كريم) و حصل ما بينا كلام و قررنا إننا نركب من ناحية البحر .. و أتمشينا شوية مسافة بسرعة ... و يومها المطرة مطرت بكل قوتها ... و أنا كل همى إنى ألحق الدقايق الأخيرة للسنة على الشاطئ ... و فعلا ركبنا العربية و أتكلمنا سوا و عرفت إنة شغال فى شركة موبينيل .. و بالصدفة من ضمن كلامة عرفت إنة (مسيحى) و حسيت إنة شاب جدع و محترم و فضلنا نتكلم طول الطريق لحد ما نزلت أدم (جيلاتى عزة) اللى قرب المندرة على البحر و دخلت الشاطئ و هو كمل للمنتزة و فعلا دخلت و قعدت أدام البحر و زى عادتى .. كنت بسأل يا ترى .. إية اللى مكتوب فى صفحات السنة الجديدة ... خصوصا إنها السنة المنتظرة !!!!
كتييييييييييير ... حاجات كتير حصلت .. و الغريب إنى مكنتش أتوقعها ... و الأغرب إنها مش فى حياتى الشخصية بس .. لكن على العالم بحالة
حسيت إن سنة 2011 سنة تخليص الحقوق .. أو سنة تصفية حساب ... على العام أو الخاص ... نلاقى سقوط حكام بنظامهم ... نلاقى كثير من الموت !
نلاقى كنيسة بتنفجر فى أول دقيقة فيها .. و فى وسطها محاولات لأشعال فتنة بين المسلمين و المسيحيين ... لكن الجميل أوى أوى أوى .... إنى أنا و كريم (المسيحى) أصبحنا أكثر صداقة و أخوة و قرب ... و بقولة من هنا Happy New Year Ya Kemo
أو عيد سعيد يا كيموووو !
كل سنة و أنتم طيبين :)
| 