سبحان الله زى إنهاردة و دلوقتى فى الشهر اللى فات دونت (تجربة جديدة) و كان عندى الأحساس إن الحكاية مجرد تجربة مش هتاخد وقت كتير !!! و فعلا إحساس كان صحيح لأن مقدر ليا إنى أدون دلوقتى تدوينة جديدة بإسم (نهاية التجربة) بس الجميل إن أى حاجة بنعيشها لازم نخرج منها بحاجات حلوة ... حتى لو بنتضايق فى بعض الأحيان بس لازم نكتسب شئ جديد ... ستوديو التصوير اللى ذكرتة زى إنهاردة الشهر اللى فات أنتهت تجربتة و طلعت منها بناس جميلة أوى .. حسيت فيهم التقدير و المحبة و الأحترام ... و برضة أتعاملت مع ناس عندها (نقص) بس قدرت إنى أسيطر و أعمل حدود معاهم .. عشان كدة كانوا بيجوا لحد عندى و بيحذروا المعاملة معايا طلعت بخبرات فنية جديدة و أكتسبت روح حلوة أوى من أبتسامة الناس ... يا سلام لما أشوف حد و أبتسم فى وشة و ألاقية هو كمان يبتسم و مع شوية تقدير لية أحس إنة عايز يخدنى بالحضن ... الناس جميلة أوى مش زى ما شائع إن الناس أصبحت وحشة و نفوسها سيئة .. بالعكس مع أسؤ حد لما أتعمق جواة لمدة ثوانى ألاقى الطفل موجود بس مستخبى و لابس الوش بتاع سنة عشان يظهر نفسة قوى .. بس مازالت البرائة و الطيبة خصوصا فى المكان اللى شبة شعبى !! فى الشهر دة أكتسبت صداقات و محبة الناس اللى كانوا شغالين معايا ... أد إية حسيت دة لما لمست التأثير جواهم لما عرفوا إنى هسيبهم .. بس طبعا أنا مش هقطع زيارتى عنهم لأنى حاسس بالصدق فيهم ... حاجات كتيرة معناوية أكتسبتها ... و أجملها إنى أتأكدت إن الرزق دة المفروض أخر حاجة نفكر فيها و منحسبهاش بالعقل لأنة مقسوم و مقدر هيجى أمتى و هيروح على فين فى الشهر دة أتعرفت على أخت عزيزة من خلال الأنترنت فى فترة قصيرة جدا سابت بصمتها فى ذكرياتى و أتعلمت من معرفتها حكم ربانية كتيرة جدا .. و إن ممكن تعمل شئ فى الحاضر عشان يكون سبب لحدث مستقبلى عمرك ما تتوقعة ! فى شهر واحد حصلت حاجات كتيرة جدا جدا .. و ميبقاش منة إلا حكاوى و صور فى العقل و شوية تدوينات تسمى بالذكريات
| 