ياااااااااااة ... بعد يوم شغل و معافرة مع الناس ... قاعد على الكمبيوتر و دماغى تقييييلة و جسمى كلة واجعنى .. بس حاسس براحة داخلية أنا بحب الناس ... و بحب أشوف وشوشهم المختلفة .. الوش السمح البشوش و الوش اللئيم الخبيث و الوش البرئ .. و مع ذكر كل حاجة من دى بتيجى صور فى عينى من وشوش الناس دى !
و فى زحمة الشغل بشوف كل الوشوش .. و بحس بمتعة و أنا بتكلم معاهم و أحيانا و انا بناهد معاهم ... و يا سلام لما ألاقى نفسى مضغووط ... و حواليا ناس كتير و الكل عايز طلبة .. و أنا أثبت فى دة شوية و أضحك مع دى شوية و أهدى دى شوية .. بصراحة هما معزورين لأن الغلط عندنا !!
من الوشوش البريئة اللى شوفتها إنهاردة بنوتة جميلة أوى أوى أوى أسمها (ريم) البنت دى عندها حاليا (12 سنة) .. بنت بسم الله ماشاء الله .. رقيقة جدا و هادية أوى أوى كانت جاية تاخد الصور بتاعتها و للأسف طلعت مش كاملة .. و البنت كان جاية مع صحابتها و فى الأخر سبوها لما الوقت طول و بقت لوحدها و الوقت طبعا أتأخر ... بصراحة أنا خوفت على البنت تمشى لوحدها خصوصا الأيام دى اللى زاد فيها مرضى النفوس و البنت جميلة .. أخدتها و وصلتها لحد قرب بيتها و عرفت إنها بتحب (الرسم) .. بنت زى دى ملاك صغير ممكن لما أشوفها تهّوّن عليا تعب اليوم كلة
برضة من المواقف الطريفة اللى حصلت ... كان فى ولد شغال فى الأستوديو أسمة إبراهيم .. ولد غلبان جدا .. و كان فى ناس كتير من اللى شغالين مش موجودين و أنا و واحد معايا أسمة (شريف) و إبراهيم دة .... و الأستوديو مليان ناس و أنا واقف عند المكتب عمال أعمل وصولات و أسلم صور و أسمع شكاوى ناس و أفوجئ إن فى عريس جة عشان يتصور و الناس عمالة تزيد و قاعدين مستنين دورهم و فى الأخر إبراهيم يوقف على السلم اللى فى الأستوديو وهو بيقول (هو فى حد هيتصور؟!!) طبعا الناس كلها قالت علية غبى و الأستوديو كلة ضحك فى نفس واحد ... و أنا فى وسط توترى و ضحكى قولتلة (أنا هسبلك المحل و أمشى ما هى نقصاك) !
و هى دى ميزة زحمة الشغل ... إن فى وسط التوتر و الضغط .. بتلاقى مواقف كتييييير بتعلم معاك .. و يا سلام لو فى وسط كل دة تشوف وش جميل يريحك .. و الأجمل لما تخلص شغلك و تقعد على الكرسى ترتاح فى هدوووووووؤ تحس براااحة ... زى الظمأن اللى بتروية المية !
هى دى بالظبط الحياة .. رغم ضغوطها و تعبها .. إلا إن فى حاجات كتير حلوة فيها بتخلينا عايزين نعيد أيام التعب دى عشان نرجع تانى للحاجات الحلوة دى .. و كل ما يزيد الضغط و التعب بعدها تزيد متعة الأحساس بالراحة و الهدووووؤ
| 