تجربة جديدة .. و خبرة جديدة .. و ناس جديدة
أول يوم إنهاردة أعيش حياة (ستوديو التصوير) .. بمقاسات الصور و أسعارها و الألبومات و أفلام (الكودك) .... الفوتوشوب ... الكادر بتاع التصوير .. و ناس طالعة و ناس داخلة
و العامل المشترك بين الأستوديو و غيرة إن فى ناس حلوة و دمها خفيف و فى ناس معقدة و فى ناس مكارة و فى ناس طيبة و فى ناس محتارة و ناس ليها ذكرى حلوة ...
دة غير بقى الناس اللى داخلة و الناس اللى خارجة ... حيااااااااااااااااة
الحقيقة أنا عارف إنها محطة من ضمن المحطاط ... و هتسيب ذكرى .. عارف إن فى حاجات كتيرة على وضع الأنتظار و بنقول عليها (مؤقتا) و لما تعدى نفتكرها و نقول يااااااا... أنا عرفت فى الأيام دى فلان و أتخنقت مع فلان و كان فى أنسان جدع و غيرة ندل
و الأجمل لما تطبع كلماتك فى سطور فى نفس وقت الذكرى و بعد وقت تيجى عينك على الكلمات دى و تقول يااااااة .. دة بعد التدوينة دى حصل كتير
ومش معنى كلمة (كتير) إن اللى حصل حزين أو خطير ... و لكن طول ما القطر ماشى هتضحك و تفرح و تفشل و تنجح و هتحب و هتتحب و تفضل مستنى اليوم اللى يتحقق فية أمالك ... و لما تتحقق تحس بقيمة سعيك
رامى الجنزورى
|